အဆိုးရွားဆုံး အင်တာနက်အသုံးပြုမှု အလေ့အထများနှင့် ပတ်သက်၍ Telenor က စစ်တမ်းကောက်ယူ



Telenor သည် အဆိုးရွားဆုံး အင်တာနက်အသုံးပြုမှု အလေ့အထများဟူသော ခေါင်းစဉ်ဖြင့် မလေးရှား ၊ အိန္ဒိယ၊ ထိုင်း၊ စင်ကာပူ နိုင်ငံတို့မှ လူဦးရေ ၄၀၁ ဦးကို စစ်တမ်းကောက်ယူခဲ့သည်ဟု သိရသည်။
စစ်တမ်းကောက်ယူမှုအရ စိတ်အနှောင့်အယှက်ဖြစ်စရာ အကောင်းဆုံး အမှုအကျင့် ၅ ခုကို တွေ့ရှိခဲ့ကြောင်း၊ ၎င်းတို့မှာ မဟုတ်မမှန်သော ကောလာ ဟလများကို ဖြန့်ဝေခြင်း ၊ လှောင်ပြောင်ကျီစယ်ခြင်း ၊ မသင့်လျော်သော အကြောင်းအရာများကို share လုပ်ခြင်း ၊ အွန်လိုင်းဂိမ်းကစားရန် invite များပေးပို့ခြင်းနှင့် ရုန့်ရင်းကြမ်းတမ်းသော စကားလုံးများ သုံးနှုန်းခြင်းတို့ ဖြစ်သည်ဟု သိရသည်။
ယခု စစ်တမ်းကောက်ယူမှုတွင် မြန်မာနိုင်ငံမှ အင်တာနက်အသုံးပြုသူများ ပါဝင်ခြင်းမရှိသော်လည်း လေ့လာခဲ့ သော နိုင်ငံများနှင့် ယှဉ်ကြည့်ပါက လူမှု ဆက်သွယ်ရေး ကွန်ရက် အသုံးပြုသူများတွင် ဓလေ့များ တူညီနေသည်ကို တွေ့ရသည်ဟု Telenor က သတင်းထုတ်ပြန်ထားသည်။
မြန်မာနိုင်ငံတွင် facebook အသုံးပြုမှု အားလုံး၏ ၆၀ ရာခိုင်နှုန်းသည် Telenor ကွန်ရက်ပေါ်တွင် အသုံးပြုနေခြင်းဖြစ်သည်ဟု ၎င်းတို့က ပြောဆိုထားပြီး အသုံးပြုသူ ၁၂ သန်းတွင် ၅၇ ရာခိုင်နှုန်းသည် ပုံမှန် အင်တာနက် အသုံးပြုသူများဖြစ်ကြောင်း၊ ၆၀ ရာခိုင်နှုန်းနီးပါးသည် စမတ်ဖုန်းများ ကိုင်ဆောင်ထားကြကြောင်း Telenor က ကြေညာခဲ့သည်။
စစ်တမ်းအရ နိုင်ငံအားလုံးရှိ ၆၇ ရာခိုင်နှုန်းသည် အင်တာနက် အလွန်အကျွံစွဲလမ်းသူများအဖြစ် သဘောတူကြပြီး ထိုင်းနိုင်ငံတွင်မူ ၈၀ ရာခိုင်နှုန်းသည် အင်တာနက် အလွန်အမင်းသုံးစွဲကြောင်း ဝန်ခံခဲ့ကြသည်။ အမျိုးသား၊ အမျိုးသမီးမရွေး အားလုံးနီးပါး ဝန်ခံခဲ့သော်လည်း အမျိုးသမီးဦးရေသည် အမျိုးသားများထက် အနည်းငယ်ပိုမိုများပြားကြောင်း စစ်တမ်းက ဖော်ပြခဲ့သည်။
Powered by Blogger.