နိုင်ငံတော် သမ္မတ ဦးအေးသာအောင် ဖြစ်လာနိုင်ဖွယ်ရှိ

နိုင်ငံတော် သမ္မတ ဦးအေးသာအောင် ဖြစ်လာနိုင်ဖွယ်ရှိဟု Tomorrow သတင်းအဖွဲ့ ခန့်မှန်း

ရန်ကုန်၊ နိုဝင်ဘာ ၂၅ ရက်

အမျိုးသားဒီမိုကရေစီအဖွဲ့ချူပ် NLD ၏ အမျိုးသားရင်ကြားစေ့ရေးမူဝါဒအရ ဒုသမ္မတနှင့် လွှတ်တော်ဥက္ကဌ ဖြစ်လာနိုင်သူများကို Tomorrow သတင်းအဖွဲ့မှ သုံးသပ်ရေးသားခဲ့ရာတွင် ရခိုင်အမျိုးသားပါတီ ဗဟိုအလုပ်အမှုဆောင် ကော်မတီဝင် မြေပုံမြို့နယ်မှ အနိုင်ရ အမျိုးသား လွှတ်တော်ကိုယ်စားလှယ် ဦးအေးသာအောင်မှာ သမ္မတ ဖြစ်လာနိုင်ခြေရှိသူဖြစ်ကြောင်း ခန့်မှန်းရေးသား ဖော်ပြခဲ့ပါတယ်။

Tomorrow သတင်းအဖွဲ့၏ ရေးသားဖော်ပြချက်အရ ယခုရွေးကောက်ပွဲတွင် အင်အားအကြီးဆုံး ပါတီကြီး နှစ်ခုဖြစ်တဲ့ USDP နှင့် NLD က လွဲရင် အင်အားအကောင်းဆုံးပါတီများမှာ ရှမ်းတိုင်းရင်းသားများ ဒီမိုကရေစီအဖွဲ့ချူပ် SNLD နှင့် ရခိုင်အမျိုးသားပါတီ ANP နှစ်ပါတီသာ ရှိကြောင်း၊ အဆိုပါ ပါတီနှစ်ခုမှာ ၁၉၈၈ ခုနှစ် ဒီမိုကရေစီ အရေးတော်ပုံကြီး အလွန် လိုအပ်ချက်အရ ပေါ်ပေါက်လာခဲ့တဲ့ ပါတီများဖြစ်ပြီး NLD နှင့်လည်း မဟာမိတ်ဆက်ဆံရေးရှိတဲ့ ပါတီများ ဖြစ်သည့်အပြင် NLD နှင့်အတူ အာဏာရှင်စနစ်ကို တွန်လှန်ခဲ့သော CRPP အဖွဲ့ဝင်များအနက် ယခု ရွေးကောက်ပွဲတွင် အနိုင်ရရှိခဲ့သူမှာ ဦးအေးသာအောင် နှင့် ဇိုမီး ဒီမိုကရေစီအဖွဲ့ချူပ်မှ ဦးပူကျင့်ရှင်းထန်တို့သာ ရှိကြောင်း ရေးသားဖော်ပြခဲ့ပါတယ်။

ဒါ့အပြင် ဦးအေးသာအောင် သမ္မတ ဖြစ်လာနိုင်ခြေရှိသူဟု ခန့်မှန်းရခြင်းနှင့် ပတ်သက်၍ သတင်းအဖွဲ့က " ရခိုင်ပြည်နယ် အမျိုးသား လွှတ်တော် အမှတ်(၆)တွင် ရွေးချယ်ခံခဲ့ရသည့် ဦးအေးသာအောင်သည် ရခိုင်အမျိုးသားပါတီ (ANP)၏ ဗဟိုအလုပ်အမှုဆောင် တစ်ဦးဖြစ်သည်။ ရခိုင်ပြည်နယ် မြေပုံမြို့နယ်၌ မွေးဖွားခဲ့ပြီးနောက် ၁၉၇၀ခုနှစ်တွင် မဆလပါတီအား ဆန့်ကျင်သည့် လှုပ်ရှားမှုများ၌ ပါဝင်ခဲ့သည်။ ထို့ကြောင့် ၁၉၇၅ခုနှစ်တွင် ပထမဦးဆုံးအကြိမ် ထောင်ကျခဲ့သည်။ ၁၉၈၈ခုနှစ် ဒီမိုကရေစီ အရေးတော်ပုံတွင် ရခိုင်အမျိုးသား သမဂ္ဂကို ဖွဲ့စည်းခဲ့ပြီး တက်တက်ကြွကြွ ပါဝင်လှုပ်ရှားခဲ့သည်။ နိုင်ငံရေးပါတီများ ထူထောင်ခွင့်ရသောအခါ ရခိုင်ဒီမိုကရေစီ ပါတီကို တည်ထောင်ခဲ့ပြီး ရန်ကုန်တိုင်း အထွေထွေ အတွင်းရေးမှူးအဖြစ် တာဝန်ယူခဲ့သည်။ ၁၉၈၉ခုနှစ်တွင် တိုင်းရင်းသားပါတီ ၂၀ ပါဝင်သော ပြည်ထောင်စု တိုင်းရင်းသား လူမျိုးများ ဒီမိုကရေစီ အဖွဲ့ချုပ် မူဝါဒရေးရာ ကော်မတီ အတွင်းရေးမှူးအဖြစ် ဆောင်ရွက်ခဲ့သည်။ ၁၉၉၈ ခုနှစ်တွင် လွှတ်တော် ကိုယ်စားပြု ကော်မတီ (CRPP)တွင် အတွင်းရေးမှူးအဖြစ် တာဝန်ပေးအပ်ခြင်း ခံခဲ့ရသည်။ ၂၀၀၀ခုနှစ်တွင် စစ်အစိုးရမှ ထောင်ဒဏ် ၂၁နှစ် ချမှတ်ခဲ့သည်။ ၂၀၁၀ အထွေထွေ ရွေးကောက်ပွဲအား သပိတ်မှောက်ခဲ့ပြီး ၂၀၁၂ခုနှစ်တွင် ရခိုင်ဒီမိုကရေစီ အဖွဲ့ချုပ်ကို ပြန်လည်မှတ်ပုံတင်ပြီး ဥက္ကဋ္ဌအဖြစ် တာဝန်ယူခဲ့သည်။ ရခိုင် ဒီမိုကရေစီ အဖွဲ့ချုပ်နှင့် ရခိုင်တိုင်းရင်းသားများ ဖွံ့ဖြိုးရေးပါတီ ပူးပေါင်းသည့်အခါ ခေါင်းဆောင်အဖြစ် တာဝန်ယူခဲ့သည်။ ၂၀၁၅ အထွေထွေ ရွေးကောက်ပွဲ အတွက် ရခိုင်လူမျိုးများ တစ်စုတစ်စည်းတည်း ဖြစ်ရေးအတွက် ရခိုင်အမျိုးသားပါတီနှင့် ပူးပေါင်းရာတွင် ဗဟို အလုပ်အမှုဆောင် တာဝန်ကိုယူခဲ့သည်။ ယခုအခါ အမျိုးသား လွှတ်တော်တွင် ဒီချုပ်အနေဖြင့် တိုင်းရင်းသားများနှင့် လက်တွဲဆောင်ရွက်ရေး အတွက် အမျိုးသားလွှတ်တော်မှ ရွေးချယ်သည့် သမ္မတလောင်း တစ်ဦး အဖြစ်လည်းကောင်း၊ အမျိုးသားလွှတ်တော် ဥက္ကဋ္ဌအဖြစ် လည်းကောင်း ရွေးချယ်မည်ဆိုပါက ရွေးချယ်သင့်သည့် ရခိုင်တိုင်းရင်းသား ခေါင်းဆောင်တစ်ဦး ဖြစ်သည်။ အသက်အရွယ်အရ အသက် ၇၀ ရှိပြီဖြစ်သော်လည်း ဒီမိုကရေစီ အရေးတော်ပုံတစ်လျှောက် ယုံကြည်ချက် ခိုင်မာမှု၊ အမျိုးသား ဒီမိုကရေစီ အဖွဲ့ချုပ်နှင့် လက်တွဲဆောင်ရွက်ရာတွင် သစ္စာရှိမှု၊ နိုင်ငံရေး အတွေ့အကြုံ ကြွယ်ဝမှုများကြောင့် ဦးအေးသာအောင်အား အမျိုးသားလွှတ်တော် ကိုယ်စားပြု သမ္မတလောင်း (သို့မဟုတ်) အမျိုးသား လွှတ်တော် ဥက္ကဋ္ဌ ဖြစ်လာခဲ့လျှင်လည်း အံ့သြထူးဆန်းဖွယ် မရှိပေ။" ဟူ၍ သုံးသပ်ခန့်မှန်းထားတာကို တွေ့ရပါတယ်။

ဓာတ်ပုံ - ၁၉၉၀ ရွေးကောက်ပွဲ အနိုင်ရ CRPP အတွင်းရေးမှုးအဖြစ် တာဝန်ထမ်းဆောင်ခဲ့သော ဦးအေးသာအောင်ကို အဖွဲ့ဝင်များနှင့်အတူ တွေ့ရစဉ်။

RIA
Powered by Blogger.