*နွားနက်ဆွဲတဲ့_မသာလှည်း(စ/ဆုံး)


ဆက်မင်းနောင် (ရူပ) ရေးသားသည်...။

ညသည်ပကတိ နာကျင်ခြောက်ခြားဖွယ်ကောင်းနေ၏။

သူ့မျက်စိရှေ့မှာမြင်နေရသောမြင်ကွင်းများသည် အရောင်တမျိုးဖြင့်တောက်ပနေသည်။
သို့သော်မည်သည့်အရာကိုမျှပြတ်သားစွာ မမြင်ရ ။ဝိုးတဝါးဖြစ်နေသည်။

ငါဘယ်ကိုရောက်နေတာလဲ…ဟု ညီခန့် တွေးလိုက်မိသည်။ထူးဆန်းသည်က ဒီမြင်ကွင်းတွေက သူနဲ့ရင်းနှီးနေသလိုခံစားနေရသည်။သို့သော်ဘယ်နေရာမှန်း မမှတ်မိ…။

သိတာတော့သေချာသည်။ဒါဘယ်နေရာပါလိမ့်…။

နေရာတိုင်းကို စူးရှရှအလင်းရောင်တစ်ခုကဖုံးလွှမ်းနေသဖြင့် သူ့မျက်လုံးတွေပင်ကျိန်းစပ်လာသည်။ထိုအလင်းရောင်ကိုလက်ဖြင့်ကာလိုက်ပြီးရှေ့တည့်တည့်ကို သူလှမ်းကြည့်လိုက်သည်။

အိမ်တစ်လုံး…။

ပုံစံကနဲနဲတော့ထူးခြားသည်။စိတ်ဝင်စားသဖြင့်ထိုအိမ်ဆီသို့ သူလျှောက်သွားလိုက်သည်။

ထိုသို့သွားနေရင်းကိုယ့်ခြေထောက်ကိုပြန်ငုံ့ကြည့်မိသောအခါ ခါတိုင်းလမ်းလျှောက်နေသည်နှင့်မတူတာကို သူသတိထားမိသည်။

လေတိုက်၍ လွင့်နေသောငှက်မွေးတခုလိုဖြစ်နေသည်။
ငါလမ်းလျှောက်နေတာမှ ဟုတ်ရဲ့လား…????

အိမ်ပေါက်ဝကိုလှမ်းကြည့်လိုက်တော့ လူတစ်ယောက်မတ်တပ်ရပ်နေသည်။

ခံစားချက်ကင်းမဲ့သော မျက်နှာထား စူးရဲခက်ထန်လှသောမျက်လုံးတို့ဖြင့် ညီခန့် ကိုစိုက်ကြည့်နေသည်။

ညီခန့်ပြုံးပြလိုက်သည်။
သို့သော်ထိုသူကအလျဉ်းတုံ့ပြန်ခြင်းမရှိ…။ထို့ကြောင့်အသံထွက်နှုတ်ဆက်ဖို့ ညီခန့် ပါးစပ်ဟလိုက်သည်။

"ဟင်"

ခုမှသတိထားမိသည်။ထိုနေရာတွင် အသံဆိုလို့အပ်ကျသံမပြောနှင့် ကိုယ့်အသက်ရှူသံပင်ကိုယ်မကြားရ။ရှိသမျှအရာအားလုံးတိတ်ဆိတ်ငြိမ်သက်နေသည်။

ညီခန့်ကြိုးစားပြီးအော်ကြည့်လိုက်သည်။အသံတွေကထွက်မလာ…။

ဒါ…ဒါ အသံကင်းမဲ့တဲ့နေရာလား…????

ညီခန့် အထိတ်တလန့်ဖြင့် ဘေးဘီဝဲယာကို လှည့်ကြည့်လိုက်သည်။အားလုံးက ပကတိတိတ်ဆိတ်လျက်…။တိတ်ဆိတ်လွန်းသည့်အတွက် ကိုယ့်အတွေးထဲမှစကားသံကိုပင် အကျယ်ကြီးပြန်ကြားနေရသည်။

ထိုအချိန်မှာပင်…
တိတ်ဆိတ်မှုကိုဖြိုခွင်းလိုက်သော အသံတစ်သံထွက်ပေါ် လာသည်။

ညီခန့်လှည့်ကြည့်လိုက်တော့ လှည်းတစ်စီး…။
အပေါ်တွင် အနက်ရောင်ခေါင်းတလားတစ်လုံးတင်ထားပြီး တစ်စီးလုံးအနက်ရောင်တွေချည်းဖြစ်သည်။

ကုန်ကုန်ပြောရလျှင် ထိုလှည်းကို ဆွဲသောနွားပင်အနက်ရောင်ဖြစ်လေသည်။
မောင်းနှင်သူမပါသော အနက်ရောင် လှည်းတစ်ခုဖြစ်သည်။

ထိုလှည်းက ညီခန့်တို့နားကိုရောက်တော့ ရပ်သွားသည်။ညီခန့်ကြက်သေသေပြီးကြည့်နေမိစဉ်မှာပင် သူ့နားထဲသို့ ခပ်အက်အက် အမိန့်ပေးသံတစ်ခုက ကြီးစိုးဝင်ရောက်လာသည်။

"အဲ့ဒီလှည်းပေါ်ကို တက်လိုက်!!! "

တိတ်ဆိတ်နေသည့်ကမ္ဘာတွင်ထိုအမိန့်ပေးသံက မိုးခြိမ်းသံအလား မြည်ဟိန်းလျက်…။

ထိုအမိန့်ပေးသံက ခုနကလူကြီးဆီမှ မဟုတ် အခြားတစ်နေရာမှဖြစ်သည်။ထိုလူကြီးကတော့ ညီခန့်ကို စိုက်ကြည့်နေဆဲ…။

ထိုအသံလာရာဘက်ဆီသို့ မှန်း၍ ဦးညွတ်ကာအရိုအသေပေးလိုက်ပြီး လှည်းပေါ်တက်လိုက်သည်။ထူးဆန်းသည်က ထိုအမိန့်ပေးသံကို သူလွန်ဆန်လို့မရခြင်းပင်…။

သူလှည်းပေါ်ရောက်တော့ အမိန့်ပေးသံနောက်တစ်ခုကထွက်ပေါ်လာသည်။

"လှည်းရပ်တဲ့နေရာရောက်ရင် လှည်းပေါ်က ခေါင်းတလားကို အဲ့ဒီနေရာမှာချခဲ့"

ထိုအမိန့်ပေးသံအဆုံးမှာပင် ထိုလှည်းက ဆောင့်ထွက်သွား၏။

သူအနက်ရောင်နွားကြီးကို ကြည့်ရင်းတွေးမိသည်…

ဒါ…ဘယ်နည်းနဲ့မှတိရစ္ဆာန်တစ်ကောင်မဖြစ်နိုင်ပေ…။
မကောင်းဆိုးဝါးတစ်ကောင်ကောင်က နွားယောင်ဖန်ဆင်းထားတာပဲဖြစ်ရမည်။

ပြေးလွှားနေပုံကဝိညာဉ်ဆန်လွန်းနေသည်။ညီခန့် နောက်ကျောမှခေါင်းတလားကိုမှီပြီး ခြေပစ်လက်ပစ်ထိုင်ချလိုက်သည်။

ချက်ချင်းဆိုသလိုသူ့ခေါင်းထဲ အတွေးတစ်ခုကဝင်လာသည်။

ဒီလှည်း က ဘယ်ကိုသွားနေတာလဲ…???
ဘယ်နေရာ ရောက်ရင်ရော ရပ်မှာလဲ…???

သူအပြင်းအထန်စဉ်းစားကြည့်သည်။စဉ်းစားလို့မရ ဦးခေါင်းတစ်ခုလုံက ဟာလာဟင်းလင်းဖြစ်နေသည်။

သို့သော်…

သူ့မသိစိတ်ထဲတွင်တော့ တစ်စုံတစ်ရာကို သိထားသလိုမျိုးခံစားနေရသည်။

အဲဒါက ဘာလဲ…ဘာလဲ…
စဉ်းစားကြည့်စမ်း…

ရုတ်တရက် ခေါင်းထဲလက်ကနဲဖြစ်သွားသည်။
သိပြီ…။

ဒီလှည်းက ရှေးလူကြီးတွေပြောပြောနေတဲ့ မသာလှည်းဖြစ်ရမည်။

လှည်းရပ်သွားတာနဲ့ ဒီခေါင်းတလားကိုချပေးရမည်။
ဒီခေါင်းတလားက သေမယ့်သူတွေအတွက်မရဏမင်းကကြိုတင်စီမံပေးထားတဲ့ ခေါင်းတလားဖြစ်သည်…။

ညီခန့် အနောက်မှ ခေါင်းတလားကိုလှည့်ကြည့်မိသည်။
မည်းနက်တောက်ပြောင်ပြီး မိစ္ဆာအငွေ့အသက်တွေလွှမ်းခြုံထားသည်မှာ ခြောက်ခြားဖွယ်ကောင်းနေသည်။

ဒါ ဘယ်သူ့အတွက်လဲ???

သေမိန့်ကျထားတဲ့လူတစ်ယောက်အတွက်ပဲဖြစ်မှာပေါ့ ဟု ကိုယ့်ကိုယ်ကို ပြီးစလွယ်အဖြေပေးလိုက်ရင်းရှေ့သို့ပြန်လှည့်လိုက်သည်။

ထိုအချိန်မှာပင် လှည်းက ရပ်နေပြီဖြစ်သည်။

ညီခန့် လေတချက်ချွန်လိုက်ပြီး အေးအေးလူလူပင် ခေါင်းတလားကို မ,ကာ အောက်သို့ချလိုက်သည်။
ထို့နောက် သူရောက်နေသောနေရာကိုကြည့်လိုက်သည်…။

"ဟာ……"

အထိတ်တလန့်အော်လိုက်သောအသံနှင့်အတူ မျက်လုံးများပင်ပြူးကျယ်ဝိုင်းစက်သွားပြီး သေလောက်အောင်ခြောက်ခြားတုန်လှုပ်သွားလေသည်။

သူ့မျက်စိရှေ့တွင်မြင်နေရသော အိမ်ကား သူုတို့အိမ်ပင် ဖြစ်လေသည်။

* * * * * * * * * *

ညီခန့် ချွေးတွေရွှဲနစ်ပြီးအိပ်ရာမှလန့်နိုးလာသည်။မိုးကားစင်စင်လင်းနေပြီဖြစ်သည်။ချွေးတွေကြောင့်သူ့ခန္ဓာကိုယ် က အေးစက်လျက်…

ညီခန့် အိပ်ရာမှ ဆတ်ခနဲထထိုင်လိုက်သည်။

ဒါ…ဒါ အိပ်မက်မက်နေတာလား??
ဟင့်အင်း ဘယ်လိုမှအိပ်မက်မက်နေတာမဖြစ်နိုင်…

ကြောက်လွန်းသဖြင့် ညီခန့်တစ်ကိုယ်လုံးတဆတ်ဆတ်တုန်ယင်နေသည်။

မဖြစ်ဘူး…မဖြစ်ဘူး…ဖေဖေ့ကိုသွားကြည့်ရမယ်။

စိုးရိမ်တကြီး ရေရွတ်လိုက်ပြီး ခန္ဓာကိုယ်ပေါ်မှစောင်ကိုဆွဲခွာလိုက်သည်။ကုတင်ပေါ်မှနေ၍ ခြေအစုံကိုကြမ်းပြင်ပေါ်ကို ချလိုက်တော့ ဦးခေါင်းတစ်ခုလုံးကရီဝေနောက်ကျိနေလေသည်။

တကိုယ်လုံးနုံးချိကာ ခြေလက်တို့ကို အနိုင်နိုင်သယ်လျက် ဖေဖေ့အခန်းဆီသို့လျှောက်လာလိုက်သည်။ဖေဖေနေမကောင်းဖြစ်နေတာကြာပြီ ။

ဒါ အိပ်မက်ဆိုးတစ်ခုဖြစ်ပါစေ…
အိပ်မက်ဆိုးတစ်ခုဖြစ်ကိုဖြစ်ပါစေ…။ညီခန့်နှုတ်မှ အသိမဲ့စွာတတွတ်တွတ်ရွေတ်နေသည်။

တကယ်ရော ဖေဖေသူ့အခန်းထဲမှာ အိပ်ပျော်နေပါ့မလား???

ထိုအတွေးတစ်ခုက ညီခန့်ကိုထိတ်လန့်တွန့်ဆုတ်စေသည်။တကယ်လို့ဖေဖေအသက်မရှိတော့ရင်ဘယ်လိုလုပ်မလဲ??

ဖခင်ဖြစ်သူအခန်းရှေ့တွင်ခြေစုံရပ်ရင်း ညီခန့်တစ်ယောက်သွေးပျက်ခြောက်ခြားနေသည်။
နှုတ်မှလည်းတီးတိုးဆုတောင်းလိုက်သည်…

"ဖေဖေ အသက်ရှင်လျက်ရှိပါစေ…"

အခန်းတံခါးကိုတွန်းဖွင့်လိုက်သည်။တခန်းလုံးတိတ်ဆိတ်နေသည်။ဖေဖေက ကုတင်ပေါ်တွင် မလှုပ်မယှက်အိပ်ပျော်နေ၏။

လုံးဝလှုပ်ရှားမှုမရှိ…။

"ဟင်…ဖေဖေ…"

ညီခန့်အလန့်တကြားအော်လိုက်ပြီးဖေဖေ့ကို ပြေးဖက်လိုက်သည်။ရင်ထဲတွင် ဘယ်လိုခံစားလိုက်ရမှန်းမသိ…။ဝမ်းနည်းကြေကွဲခြင်းလား…နာကျင်ကြောက်ရွံခြင်းလား…။

ထိုစဉ်မှာပင် ဦးခန့်သွင် လှုပ်ရှားလာပြီး အလန့်တကြားပြေးပြီးလာဖက်သော ညီခန့်ကို တအံ့တသြမေးလိုက်သည်။

"သား ဘာဖြစ်လို့လဲ"

ထိုအသံကြောင့် ညီခန့်မျက်နှာဝင်းလက်သွားသည်…

"ဟင်…ဖေဖေ…ဖေဖေ မသေဘူးနော်"
"ဖေဖေက ဘာလို့သေရမှာလဲသားရဲ့…"

ဖေဖေမေးတာကို ပြန်မဖြေဖြစ်တော့ပဲ ဖေဖေ့ရင်ဘတ်ပေါ်မျက်နှာအပ်ကာ ညီခန့် ငိုချလိုက်တော့သည်။

* * * * * * * * * *

ဒေါက်တာသက်ထွန်း၏ ဆေးအိတ်ကိုကူဆွဲပေးရင်း အိမ်ရှေ့ထိလိုက်ပို့ပေးလိုက်သည်။အိမ်ရှေ့ရောက်တော့ ဒေါက်တာက ညီခန့်လက်ထဲမှဆေးအိတ်ကိုယူရင်း…

"သိပ်တော့မစိုးရိမ်ရပါဘူး…ငှက်ဖျားအခံရှိလို့ ငှက်ဖျားပြန်ထလာတာပါ…ဆရာပေးတဲ့ဆေးကိုသာမှန်မှန်တိုက်ပေးပါ"

ဟုပြောပြီး ပြန်သွားလေသည်။

ညီခန့်အိမ်ထဲပြန်ဝင်လာပြီး ဧည့်ခန်းထဲရှိထိုင်ခုံပေါ်တွင် ခြေပစ်လက်ပစ်ထိုင်ချလိုက်သည်။ရုတ်ချည်းဆိုသလို ညက အိပ်မက်လိုလို တကယ့်အဖြစ်အပျက်လိုလို မြင်ကွင်းက သူ့အာရုံထဲတွင်ပြန်ပေါ်လာသည်
အနက်ရောင်ခေါင်းတလားတင် ထားတဲ့ မသာလှည်း…။

ထိုလှည်းကို ညီခန့် မောင်းလာပြီး သေမိန့်ကျသူ၏အိမ်ရှေ့တွင် အခေါင်းလာချသည်။

ထိုအိမ်က သူတို့အိမ်…။တွေးမိတိုင်းကြက်သီးများဖြန်းကနဲ ထလာသည်။ဖေဖေ့အတွက်အချိန်က ဒီညအထိသာရှိတော့သည်။

ညီခန့် ထိုင်နေရာမှ ဆတ်ခနဲ ထရပ်လိုက်သည်။

"ဟင့်အင်း…ဒါအိပ်မက်…တကယ်မဟုတ်ဘူး…"

သွေးရူးသွေးတန်းရေရွတ်လိုက်ပြီး အိမ်ရှေ့ကိုလည်းအထိတ်တလန့်ကြည့်လိုက်သည်။
သေချာပါတယ်…ငါညက အခေါင်းလာချတာ ငါတို့အိမ်ရှေ့ကိုပါ…။

စိတ်ထဲမှာလဲ ဇဝေဇဝါဖြစ်နေသည်။ထိုအတွေးတွေးမိတိုင်း စိုးရိမ်စိတ်က ရင်နှင့်အပြည့်ဖြစ်လာပြီး နှုတ်ခမ်းတွေပါ တဆတ်ဆတ်တုန်လာသည်။

ဖေဖေအသက်မှရှင်နိုင်ပါတော့မလား…ဆိုတဲ့အတွေးကလည်း ညကအဖြစ်အပျက်ကဲ့သို့ပင် ညီခန့်ကိုခြောက်လန့်နေသည်။

ဘာပဲဖြစ်ဖြစ်ခုချိန်မှာ ညီခန့် ဖေဖေ့ဘေးမှာရှိသင့်သည်။

"ဟုတ်တယ် ဖေဖေအနားမှာ ငါအမြဲတမ်းစောင့်နေမှဖြစ်မယ်"

စိတ်ကိုတင်းပြီး ဖေဖေကုတင်ဘေးမှာသာ ညီခန့်နေလိုက်တော့သည်။

* * * * * * * * * *

နေ့ခင်းဘက်ဖေဖေ့ကို ဆန်ပြုတ်တိုက် ဆေးတိုက်ပြီးကတည်းက ပင်ပန်းပြီးအိပ်ပျော်သွားလိုက်တာ ညနေစောင်းမှ ညီခန့်နိုးလာသည်။

"ခြောက်နာရီတောင်ထိုးပြီပဲ…ဖေဖေ့ကိုဆန်ပြုတ်တိုက်ဖို့ နောက်တောင်ကျနေပြီ…ဖေဖေ ဆာနေပြီလားမသိဘူး"

ဆန်ပြုတ်နှင့်ဆေးပြင်ဆင်ပြီးတော့ ဖေဖေ့ကိုနှိုးလိုက်သည်။

"ဖေဖေ…ဆန်ပြုတ်သောက်ဖို့လေ …ပြီးရင်ဆေးတခါထဲသောက်ရမယ်"

ဖေဖေ့ထံမှ တစုံတရာတုံ့ပြန်မလာသဖြင့် ညီခန့် ခေါင်းနားပန်းကြီးသွားသည်။

"ဖေဖေ………"

"ဟင်…သား ဘာဖြစ်လို့လဲ"

ညီခန့်အခုမှသက်ပြင်းချနိုင်သည်။ဖေဖေအိပ်မောကျနေသည့်အတွက် တော်ရုံနှင့်နိုးမရတာဖြစ်သည်။
ညီခန့်ကိုယ်တိုင်ကိုယ်က စိုးရိမ်စိတ်လွန်နေသောကြောင့်သာ…။

ဖေဖေ့ကိုဆန်ပြုတ်နှင့်ဆေးတိုက်ပြီးပြန်သိပ်ထားလိုက်သည်

ထို့နောက် ပန်းကန်ဆေးရန်ထွက်လာလိုက်သည်။
အိမ်ရှေ့ခန်းမှအဖြတ် ဖွင့်ထားသောပြတင်းပေါက်မှ လေတချို့တိုးဝင်လာသည်။

နေ့လည်တည်းကအိပ်ပျော်သွားသဖြင့်ပြတင်းပေါက်မပိတ်ရသေးခြင်းဖြစ်သည်။
တလက်စတည်း ပိတ်လိုက်ရန် ပြတင်းပေါက်ဆီ လျှောက်လာလိုက်သည်။

ပြတင်းပေါက်နားအရောက် အိမ်အပြင်သို့အမှတ်တမဲ့ကြည့်လိုက်ရာ…

"ဟာ…"

ရုတ်တရက် နှလုံးခုန်သံကဒိန်းကနဲ ဆောင့်တက်သွားသည်။
အိမ်ရှေ့မှာ ညက မသာလှည်းကြီးရောက်နေသည်။အခေါင်းကြီးကလည်းညက သူချထားခဲ့သည့်အတိုင်း…

"ဒါ…ဒါဆိုသူတို့ဖေဖေ့ကိုတကယ်လာခေါ်ကြပြီပေါ့…"

သွေးပျက်ဖွယ်ကောင်းလောက်သည့် မြင်ကွင်းက ညီခန့်ကိုခြောက်လန့်နေသည်။

"ငါ…ဘာလုပ်ရမလဲ…မဖြစ်ဘူး…မဖြစ်ဘူး…"

"ငါ ဘာလုပ်ရမလဲ…?? ဟာ ဟုတ်ပြီ…ငါဖေဖေ့ကို ဖွက်ထားရမယ်"

"သူတို့မတွေ့အောင် ဖွက်ထားရမယ်…"

"ဖွက်ထားရမယ်…"

သွေးရူးသွေးတန်းနှင့် ဆုံးဖြတ်ချက်တစ်ခုကို ချလိုက်သည်။ပြီးတော့ ဆေးရှိန်ဖြင့်အိပ်ပျော်နေသောဖေဖေ့ကိုချီကာ အိမ်နောက်ဖေးသို့ထွက်လိုက်သည်။

"ဖေဖေ ဒီမှာခဏပုန်းနေလိုက်ဦး သားမနက်ကျရင် လာပြန်ခေါ်မယ်…အသံမထွက်ပဲတိတ်တိတ်လေးပုန်းနေနော်သိလား…"

နှုတ်မှတီးတိုးရေရွတ်လိုက်သည်။အိပ်ပျော်နေသည့်ဖေဖေကတော့ ကြားလားမကြားလားမသိ။

ထို့နောက်ဖေဖေ့ကို အိမ်နောက်ဖေးရှိ ရေတွင်းထဲသို့ပစ်ချလိုက်တော့သည်။

"ဗွမ်း……"

ညီခန့်ရေတွင်းထဲသို့တချက်ကြည့်လိုက်သည်။ဖေဖေက ရေထဲမှာ ရုန်းကန်နေသည်။

"ဖေဖေ ငြိမ်ငြိမ်လေးနေ…အသံမထွက်နဲ့ သူတို့ကြားသွားရင်ဖေဖေ့ကို လာခေါ်သွားလိမ့်မယ်"

ထိုသို့ပြောပြီး ညီခန့်အိမ်ထဲပြန်ဝင်သွားသည်

လောကကြီးအလယ်တွင် မိဘမရှိပဲနေထိုင်ရမည့် လူတစ်ယောက်၏အဖြစ်ကို သူလက်မခံနိုင်ချေ…။

* * * * * * * * * *

ထိုအဖြစ်အပျက်ကို အစအဆုံးမြင်တွေ့လိုက်သည့် လူတစ်ယောက်ရှိနေသည်ကို ညီခန့် သိခဲ့ပါမူ……………

* * * * * * * * * *

နောက်တနေ့တွင် ညီခန့်တစ်ယောက် ရဲများလာရောက်ဖမ်းဆီးခြင်းကိုခံရတော့သည်။

မျက်မြင်သက်သေဖြစ်သော အိမ်ခေါင်းရင်းမှ ဦးနိုင်ဇော်၏ တိုင်ကြားချက်ကြောင့်ဖြစ်သည်။ဦးနိုင်ဇော်မှာ ထိုညက အိမ်သာတက်ရန်အိမ်နောက်ဖေးသို့ထွက်လာစဉ် ထိုမြင်ကွင်းအားတွေ့မြင်ခဲ့ခြင်းဖြစ်သည်။

ဤသို့ဖြင့် ညီခန့်တစ်ယောက် လူသတ်မှုဖြင့် ထောင်ခုနှစ်နှစ်ကျသွားခဲ့သည်။

နောက်ပိုင်းတွင် ထောင်မှ ဆရာဝန်များ၏ စစ်ဆေးစမ်းသပ်ချက်အရ ညီခန့်သည် စိတ်ရောဂါဝေဒနာခံစားနေရသူတစ်ဦးဖြစ်သောကြောင့် အရူးထောင်သို့ ပြောင်းရွှေ့လိုက်ကြလေသည်။

အရူးထောင်တွင်လည်း ညီခန့်ကြာကြာမနေလိုက်ရပေ။
အရူးထောင်ရောက်ပြီး ၄ရက်မြောက်ညမှာပင်

"ဟိုမှာ ငါ့ကိုလာခေါ်နေပြီ ငါ့အတွက် မသာလှည်း ရောက်နေပြီ …ငါ့ကိုလာခေါ်နေကြပြီ"

ဟုကယောင်ကတမ်းအော်ဟစ်ကာ ကိုယ့်ကိုယ်ကို ဆွဲကြိုးချပြီးအဆုံးစီရင်သွားလေသည်။

* * * * * * * * * *

အထက်ပါဖြစ်ရပ်သည် ဥပါဒ်ဒါန်ကြောင့် ဥပါဒ်ရောက်ခြင်းလော… ?????

သို့တည်းမဟုတ်……………

* * * * * * * * * *

စာပြီးချိန်_17.2.15(9:04PM)ထိုင်းစံတော်ချိန်

Credit to-ဆက်မင်းနောင် (ရူပ)
Post by:မောင်မိုးတိမ်..
Powered by Blogger.