ဗမာအစ ကျောက်ဆည်က

ဘီစီ ၂၀၀၀ ခန့်တွင် တရုတ်ပြည် အနောက်မြောက်ပိုင်းတွင် ချီအန် (Ch'ang) ခေါ် လူမျိုးစုများနေထိုင်ကြသည်။ သူတို့သည် သိုးများ၊ ဆိတ်များကို မွေးမြူကြပြီး ဒေသခံ တရုတ်လူမျိုးများနှင့် မကြာခဏ ရန်စောင်ကာ အချင်းများကြသည်။ 

လူဦးရေများသော တရုတ်တို့က အမြဲလိုလို အနိုင်ရပြီး ဖမ်းမိသည့် ချီအန်တို့ကို သတ်ဖြတ်ကာ ယဇ်ပူဇော်ကြသည်။ နောက်ပိုင်းတွင် ချီအန် တို့သည် တရုတ်ရန်ကြောင့် အနောက်ဘက်သို့ ရွှေ့ပြောင်းအခြေချကြသည်။

တရုတ်တို့ကလည်း လိုက်လံတိုက်ခိုက်ကြရာ ဘေးအန္တရာယ် ကင်းရှင်းသော ယူနန်နယ်၏ သံလွင်နှင့် မဲခေါင် မြစ်ဝှမ်းဒေသ သို့ရောက်ရှိသည့်အခါမှသာ ချီအန် တို့ အေးချမ်းစွာ နေထိုင်နိုင်တော့သည်။

ချီအန်တို့သည် ယူနန်နယ်တွင် နေထိုင်ရင်း လူဦးရေ တိုးပွားလာသလို လူမျိုးစုနာမည်လည်း ပြောင်းလဲလာခဲ့သည်။ မင်း (Mang) လူမျိုးများ အဖြစ် တရုတ်တို့၏ မှတ်တမ်းများ တွင် တွေ့ရပြီး သိုးမွေးသည့် အဆင့်မှ မြင်းမွေးသည့် အဆင့်သို့ တိုးတက် ပြောင်းလဲခဲ့သည်။

မင်း ဟု ခေါ်သော ခေတ်ဦး ဗမာလူမျိုးများသည် မြင်းသည်ကျော်များ ဖြစ်လာပြီး ပိုးစာရိုင်းပင်၏ အသားနှင့်ပြုလုပ်သော လေး ကို လက်နက်အဖြစ် ကိုင်စွဲကြသည် ဆို၏။

တရုတ်တို့၏ ရန်စောင်မှုကြောင့် ယူနန်နယ်သို့ ပြောင်းလာသော မင်းလူမျိုးများကို နန်ကျောင်တရုတ် တို့က နှောင့်ယှက်လာပြန်သည်။ နန်ကျောင်တို့သည် မင်းလူမျိုးမြင်းသည်ကျော်များကို စစ်ထဲဆွဲသွင်းကာ ၄င်းတို့ဆင်နွှဲသော စစ်ပွဲကြီးများတွင် အသုံးချခဲ့သည်။

နန်ကျောင် တို့သည် မင်းလူမျိုးတို့ကို အထက်စီးမှ အုပ်ချုပ်ရန် ကြိုးပမ်းခဲ့သော်လည်း မင်းလူမျိုးစုတို့၏ လိမ္မာပါးနပ်မှုကြောင့် နန်ကျောင်တို့ထံမှ စစ်ပညာ၊ အုပ်ချုပ်ရေးနှင့် စိုက်ပျိုးရေးပညာများကို မိမိတို့အတွက် အသုံးချနိုင်လာကြသည်။

မင်းလူမျိုးတို့သည် မည်သူတို့၏ အဖိနှိပ်ကိုမျှ မခံလိုဘဲ လွတ်လွတ်လပ်လပ် နေလိုကြသူများဖြစ်ကြသည်။ ထို့ကြောင့် မြန်မာနိုင်ငံဘက်တွင် ပျူ၊ ၊ကမ်းယံ၊ သက်လူမျိုးများ အကွဲကွဲအပြားပြားဖြင့် ကသောင်းကနင်း ဖြစ်နေကြသည့် အေဒီ ၈၀၀ ကျော်ခန့်တွင် မင်းလူမျိုးတို့သည် ဆင်မြင်းလူသူ အလုံးအရင်းဖြင့် မြန်မာနိုင်ငံထဲသို့ ပြောင်းရွှေ့လာကြသည်။

ဝင်ရောက်လာကြပုံကို တွေးမိလျှင် လွန်စွာ အားရဖွယ်ကောင်းလှသည်။ ယူနန်နယ်ထွက် အကောင်းဆုံး မြင်းကြီးများကို စီးကာ ဆင်ပေါ်ရှိ မိမိတို့ ခေါင်းဆောင်ကို ၀န်းရံလျက် အောင်လံ တလူလူလွှင့်ပြီး ရှမ်းတောင်တန်းများကို တစ်တောင်ဆင်း တစ်တောင်တက် ဖြတ်ကျော်ခဲ့ကြသည်။

ညအခါတွင် မီးပုံကြီးများ ဖိုကာ မိမိတို့၏ မြင်းများကို ရင်ကွဲ၍ သေစေသည်အထိ ခုန်စေပြီး အဿ မေဓ ယဇ်ပူဇော်ခြင်းကိုလည်း ပြုလုပ်ခဲ့ကြသည်။

ရှမ်းတောင်တန်းများကို ဖြတ်ကျော်ပြီးနောက် မင်းလူမျိုးတို့သည် ကျောက်ဆည်မြို့ အရှေ့တောင်ဘက် " နတ်ထိပ်တောင်ကြား " သို့ရောက်ရှိ်ခဲ့သည်။ နတ်ထိပ်တောင်ကြားမှ နေ၍ အနောက်ဘက်သို့ မျှော်ကြည့်လိုက်သော အခါ ပန်းလောင်မြစ်၊ စမုန်မြစ်၊ ဇော်ဂျီမြစ်တို့ဖြင့် စိမ်းလန်းစိုပြေလှသော မြေပြင်ကို မြင်လျှင် ရှေးဦးဗမာလူမျိုးများသည် အားရ၀မ်းသာပျော်ရွှင်စွာ ဖြင့် မြင်းများကို စိုင်းနှင်ကာ ပြေးဆင်းလာကြလေတော့သတည်း၊

ဗမာတို့ ၀င်ရောက်လာချိန်တွင် ပျူ ၊ ကမ်းယံ၊ သက် တို့မှာ တကွဲတပြားဖြစ်နေကြရှာသည်။

ဗမာတို့မှာမူကား လူအင်အားလည်း ပါလာသည်။ ဆင်မြင်း အလုံးအရင်းလည်း ပါလာသည်။ အုပ်ချုပ်သူ ခေါင်းဆောင်လည်း ပါလာသည်။ လက်နက်အင်အားလည်း ပါသည်။

ထို့ကြောင့် ချက်ချင်းဆိုသလို ကျောက်ဆည်ဒေသသည် ဗမာတို့၏ အခြေချမှုကြောင့် စည်ကားသိုက်မြိုက်လာခဲ့ပြီး အနီးအပါးရှိ ပျူ ၊ ကမ်းယံ၊ သက်တို့ပါ လာရောက် ပေါင်းစည်းကြသည်။

ထိုအခါ ဗမာတို့၏ ဦးဆောင်မှုဖြင့် လူမျိုးများစုစည်းနေထိုင်ကြရာမှ " မြစ်သား တစ်ဆယ့်တစ်ခရိုင် " သို့မဟုတ် " လယ်တွင်း တစ်ဆယ့်တစ် ခရိုင် " ဟု ထင်ရှားစွာ ပေါ်ပေါက်လာတော့သည်။

နောက်ဆက်တွဲ
-------------------

ကျောက်ဆည်တွင် လူဦးရေ တိုးပွားလာသောအခါ ဗမာ တို့သည် ဧရာဝတီ မြစ်ဝှမ်းဒေသများကိုလည်းကောင်း၊ မြေသြဇာကောင်းသော မင်းဘူးနယ် တို့ကိုလည်းကောင်း ပြောင်းရွှေ့ကြပြန်သည်။ အချို့ဗမာ တို့သည် မင်းဘူးနယ်မှ အမ်းတောင်ကြား ကိုဖြတ်ကာ ရခိုင်သို့ပင် ရောက်ရှိသွားကြသေးသည်။

နောက်ဆုံးတွင် တစ်နိုင်ငံလုံးအနှံ့အပြားသို့ ပျံ့ နှံ့နေထိုင်ရောက်ရှိကြပြီး ခရိုင်များဖြင့် အုပ်ချုပ်မှုမှသည် နေပြည်တော်အဖြစ် စုစည်းတည်ထောင်ရန် ဆုံးဖြတ်ကြကာ အေဒီ ၈၄၉ တွင် ပုဂံကို တည်ထောင်လိုက်ကြတော့သည်။ ပထမဆုံး ဗမာတို့ တင်မြောက်လိုက်သော အကြီးအကဲမင်းမှာ " ပျဉ်ပြား " ဖြစ်သည်။

ပျဉ်ပြားမင်းနောက်ပိုင်း အနှစ် နှစ်ရာခန့်အကြာတွင် အနော်ရထာမင်းက ပုဂံကိုဗဟိုပြု၍ ပထမဆုံးသော ဗမာဦးဆောင်သည့် ဧကရာဇ်လက်နက်နိုင်ငံတော်ကြီး တစ်ခုလုံးကို သိမ်းကျုံး ထူထောင်ကာ အရှေ့တောင်အာရှကျွန်းဆွယ်ဒေသ တွင် မော်ကွန်းသစ်တစ်ရပ်ကို ခိုင်ခိုင်မာမာ ရေးထိုးနိုင်ခဲ့လေတော့သတည်း

( ဗမာအစ တကောင်းက ဟု ဆိုရိုးရှိသော်လည်း ဗြိတိသျှ သမိုင်းပါမောက္ခ မစ္စတာလုစ်ကမူ ဗမာအစ ကျောက်ဆည်က ဟုဆိုကာ အထက်ပါ အချက်များကို အထောက်အထားများဖြင့် ဆွေးနွေးတင်ပြခဲ့သည်။ ကြောင့်အနေဖြင့် ဗဟုသုတအလို့ငှာ ရေးသားဖော်ပြခြင်းသာ ဖြစ်ပြီး မည်သူနှင့်မျှ အတိုက်အခံ ငြင်းခုံလိုခြင်းမရှိပါကြောင်း )

ပုံကို http://www.asiafinest.com/ ကယူပါတယ်။ =(^_^)=

ကျေနပ်လိမ့်မယ်လို့ မျှော်လင့်မိပါတယ်ခင်ဗျ။ 

ပဉ္စမံကြောင်
Powered by Blogger.